Големиот пожар што избувна во реонот на Ореокастро, северно од Солун, и натаму претставува сериозна закана, а пожарникарите и утринава продолжуваат со интензивната битка за негово целосно локализирање.
Во текот на ноќта пламените јазици опасно се доближиле до станбени објекти, поради што надлежните служби навремено евакуирале дел од населението. Огнот, покрај шумската површина, зафатил и индустриски објекти, меѓу кои постројка за рециклирање и текстилна фабрика, што дополнително ја усложнило ситуацијата поради силното топлинско зрачење.
Со првите утрински часови во акцијата повторно се вклучиле и противпожарните летала. Два авиона и два хеликоптери дејствуваат од воздух, а грчките власти побарале и дополнителна воздушна поддршка.
Во гаснењето учествуваат 154 пожарникари, 52 противпожарни возила и пет специјализирани пешадиски екипи. Иако пожарот предизвикал материјална штета на повеќе локации, противпожарните сили успеваат да го заштитат најголемиот дел од загрозените објекти со постојано ладење на критичните жаришта.
За време на интервенцијата четворица пожарникари биле повредени. Тројца побарале медицинска помош поради вдишување чад, а еден се здобил со ортопедска повреда. Сите се згрижени во болница и се во стабилна состојба, додека нема информации за повредени жители.
Од безбедносни причини била евакуирана и установата „Свети Пантелејмон“, каде што биле сместени лица со хронични заболувања. Дел од нив се префрлени во училишен објект, а останатите во психијатриската болница во Солун.
Во рамките на истрагата, полицијата приведе 76-годишен грчки државјанин, кој се смета за главен осомничен за предизвикување на пожарот. Според досегашните сознанија, можно е искри од неговото возило да го запалиле сувиот терен. Истражителите проверуваат и дали во моментот на настанот тој бил под дејство на алкохол или други супстанции.
Покрај пожарот кај Солун, активни огнени жаришта има и на Халкидики, како и во поширокото подрачје на Кукуш, каде што противпожарните служби остануваат во состојба на висока подготвеност поради екстремните температури и силниот ветер.
