Нафтена рафинерија во Тјумењ, во западен Сибир и на околу 1.900 километри од украинската граница, денеска била цел на напад со беспилотни летала, додека руските власти тврдат дека нападот бил одбиен.
Гувернерот на Тјумењската област, Александар Мур, соопшти дека поради заканата биле евакуирани вработените во рафинеријата и била прогласена тревога. Подоцна информираше дека беспилотното летало било соборено и дека неговите остатоци паднале во кругот на постројката.
Според него, првичните информации покажуваат дека нема оштетувања на објектот, а ситуацијата е под контрола.
Сепак, локални жители и независни медиуми објавија дека биле слушнати најмалку две експлозии во населбата Антипино, каде што се наоѓа рафинеријата. На снимки објавени на социјалните мрежи се гледа чад над индустрискиот комплекс, како и колона противпожарни возила кои се упатуваат кон местото.
Рафинеријата во Тјумењ важи за најголема во западен Сибир и има годишен капацитет за преработка од повеќе од седум милиони тони нафта.
Во исто време, украинската армија соопшти дека извршила повеќе удари врз руски воени и логистички цели. Според Киев, погоден бил патен мост преку Геничкиот теснец во Херсонската област, кој се користи за транспорт на воена опрема меѓу окупираниот Крим и руските сили на југот на Украина.
Украинските сили тврдат и дека погодиле руски противвоздушен систем „Панцир-С“ во Запорожската област, како и командни пунктови за беспилотни летала во Донечката, Запорожската и Белгородската област.
Во текот на ноќта биле извршени и повеќе напади врз окупираниот Крим. Според украински и локални извори, избувнале пожари во енергетски и транспортни објекти, меѓу кои и во термоелектраната „Таврическа“ во близина на Симферопол, како и во складишта за нафта и гас во регионот на Бахчисарај.
Пожари биле регистрирани и во близина на Геничкиот мост на Арабатската Коса, како и кај железничкиот пристап кон фабриката „Кримски Титан“ во Армјанск.
Жителите на Симферопол, Севастопол, Перевално и други населени места во текот на ноќта пријавувале експлозии и дејствување на руската противвоздушна одбрана. Засега нема независна потврда за обемот на штетите предизвикани од нападите.
