(Видео) Државјанин на Полска осомничен дека ги осквернавил статуите на Богородица и го запалил олтарот во Меѓугорје, во БиХ

Државното обвинителство на Босна и Херцеговина започна сослушување на 31-годишен државјанин на Полска, кој е осомничен за повеќе инциденти во познатото католичко светилиште Меѓугорје. По сослушувањето, обвинителството најверојатно ќе побара да му биде одреден истражен притвор.

Според обвинителството, осомничениот претходно оваа седмица со црна боја ги оштетил главната статуа на Богородица на Подбрдо и уште една помала статуа, го запалил надворешниот олтар на црквата „Свети Јаков“ и испишал навредливи пораки на полски и англиски јазик, насочени кон Меѓугорје, Богородица и визионерите.

— реклама —

Во моментов, тој се товари за кривично дело оштетување или уништување верски објекти, за кое е предвидена затворска казна од три месеци до пет години.

— реклама —

По завршувањето на сослушувањето, обвинителот ќе достави предлог до Судот на БиХ за определување истражен притвор, а судот ќе одлучи дали ќе го прифати барањето.

Случајот привлече внимание и во Полска, Хрватска и Босна и Херцеговина, откако повеќе медиуми објавија дека станува збор за лице чија животна приказна претходно била претставена во религиозно-документарниот филм „Powołany 2“ на режисерот Јан Собјерајски.

— реклама —

Во филмот, тој зборувал за тешкото детство, зависностите, животните кризи и за посетата на Меѓугорје, која ја опишал како пресвртница и почеток на неговото духовно преображение.

Полскиот портал „Stacja7.pl“ пренесе дека режисерот Собјерајски изјавил оти по снимањето на филмот осомничениот повторно се соочил со сериозни психички проблеми и животни кризи. Тој навел дека во последниот период повеќепати разговарал со него телефонски и се обидел да му помогне, но без успех.