Две ретки торнада вчера ги погодија Њујорк и Лонг Ајленд, додека силното невреме предизвика проблеми и во сообраќајот во делови од средноатлантскиот регион на САД.
Според Националната метеоролошка служба, торнадата најпрво се појавиле над водата покрај јужниот брег на Квинс и округот Насау, а потоа се преместиле на копно. Торнадото во Квинс стигнало до источниот дел на Рокавејс, јужно од меѓународниот аеродром „Џон Ф. Кенеди“.
На Лонг Ајленд биле оштетени околу 50 кабини, како и делови од покривите и ѕидовите на одморалиштето „Сан енд Сурф Бич Клуб“ во Атлантик Бич. Објектот привремено е затворен. Едно лице се здобило со полесна повреда на главата.
Локалните власти соопштија и дека имало пријави за луѓе заробени во возила поради поплавите, но нема информации за потешко повредени лица.
Жителка на Квинс раскажала дека добила предупредување за опасност од торнадо, а неколку минути подоцна од својот прозорец видела голем вртложен столб над океанот, кој се движел кон Атлантик Бич. Кога стигнал до копното, во воздухот биле подигнати големи парчиња отпад.
Торнадата се сметаат за ретка појава во Њујорк и на Лонг Ајленд. Според метеоролозите, нивната сила и времетраење вообичаено се значително помали отколку кај торнадата во централните делови на САД.
Уште едно торнадо вчера го погодило и подрачјето во близина на Довер, во сојузната држава Делавер. Тамошните власти прогласиле вонредна состојба и ги повикале жителите да останат дома. Невремето предизвикало прекини во снабдувањето со електрична енергија и соборени дрвја, но нема информации за потешки повреди.
Силните врнежи предизвикале и сериозни проблеми во сообраќајот во Њујорк. Накратко бил затворен автопатот Бруклин-Квинс поради поплави, додека автопатот Лонг Ајленд бил затворен во двата правци кај булеварот Френсис Луис во Квинс. Забележани биле и доцнења во сообраќајот на автопатот „Џеки Робинсон“.
