(Видео) Двоглавиот орел повторно поставен на Кораб, македонското знаме отстрането

Двоглавиот орел повторно е поставен на врвот Кораб, додека македонското знаме кое во меѓувреме било поставено на локацијата е отстрането, објави порталот на албански јазик „Коха“.

Порталот објави и снимки од локацијата, наведувајќи дека симболот бил вратен откако пред неколку дена бил отстранет.

— реклама —

„Двоглавиот орел се врати на највисокиот врв на планината Кораб, планина која ги поврзува Македонија и Албанија. Симболот на двоглавиот орел беше отстранет пред два дена од група Македонци, кои го поставија и знамето на Македонија“, пишува „Коха“.

Во објавата се наведува дека новите снимки покажуваат дека македонското знаме сега е отстрането.

Случајот со симболите на Кораб започна откако на социјалните мрежи се појавија фотографии на кои се гледаше голем метален двоглав орел поставен на врвот. На локацијата беа забележани и албанско знаме и симбол на УЧК.

— реклама —

По реакциите во јавноста, Министерството за внатрешни работи соопшти дека е запознаено со случајот и дека во координација со планинарските друштва и надлежните институции ги проверува околностите.

Според информациите со кои тогаш располагаше МВР, обележјето било поставено од другата страна на врвот Кораб, односно надвор од територијата на Македонија.

— реклама —

Неколку дена подоцна двоглавиот орел беше отстранет од локацијата.

На отстранувањето реагираше Федерацијата на Албанија за планинарство и планински туризам, која тврдеше дека симболот бил поставен од тим албански планинари и побара од албанските институции да го истражат случајот, да утврдат кој го отстранил и да преземат чекори за негово враќање.

Федерацијата во својата реакција се повика и на информацијата од македонското МВР дека местото на кое бил поставен симболот е надвор од територијата на Македонија.

— реклама —

Истовремено, од Федерацијата порачаа дека постапките на поединци не треба да ги нарушат односите и соработката меѓу планинарските заедници од двете земји.

Сега случајот добива ново продолжение. Според денешната објава на „Коха“, двоглавиот орел е повторно поставен, а македонското знаме е тргнато од локацијата.