Планинарските здруженија загрижени поради отстранувањето на двоглавиот орел од Кораб

Унијата на планинарски здруженија изрази загриженост поради извештаите за отстранувањето на симболот на двоглавиот орел од областа на врвот Кораб.

Во објавата се посочува дека Кораб е заедничко природно богатство на Македонија и Албанија, како и место каде што се среќаваат планинари и љубители на природата од двете земји.

— реклама —

Од Унијата велат дека на планинските врвови се поставени различни симболи, меѓу кои крстови и национални обележја, и оти законите и правилата треба еднакво да се применуваат во сите случаи, без оглед на симболот или заедницата со која се поврзува.

„Поставувањето или отстранувањето на симболи без соодветно овластување може да предизвика недоразбирања и тензии“, наведуваат од Унијата.

— реклама —

Во објавата се посочува и дека, според нив, фактот што врвот на Кораб се наоѓа во рамките на граничната линија на Албанија го прави отстранувањето на двоглавиот орел дополнително спорно.

— реклама —

Унијата го оцени чинот како чин со националистичка и примитивна позадина и побара надлежните институции итно да постапат и да ги утврдат одговорните.

Истовремено, упатен е повик до Федерацијата на планински спортови, планинарските здруженија и планинарите да се оградат од случајот и да дејствуваат одговорно, со цел ваквите настани да не придонесуваат за раздор меѓу заедниците.

— реклама —

„Кораб и нашите планини треба да останат простори за спорт, пријателство, меѓусебно почитување и грижа за природата“, се наведува во објавата.

Од Унијата ги повикаа надлежните институции да соработуваат за расчистување на случајот и за уедначена примена на правилата во сите планински области.