Украинските сили извршиле обемен ноќен напад со дронови и ракети врз повеќе региони во Русија, при што, според локални извори и објави на социјалните мрежи, биле погодени објекти поврзани со воено-индустрискиот сектор.
Еден од главните удари бил насочен кон државниот институт „ВНИИР-Прогрес“ во градот Чебоксари, во Чувашката Република, лоциран на околу 1.200 километри од украинската граница. Станува збор за капацитет што развива компоненти за високопрецизно оружје и системи за електронско војување.
Руските Телеграм-канали тврдат дека објектот бил погоден со ракета „Фламинго“, украинско оружје со долг дострел, по што избувнал пожар. Подоцна, според сведоштва на жители, следеле нови напади со дронови врз истата локација. Регионалните власти потврдија дека едно лице е повредено.
Паралелно, пријавен е и напад врз една од најголемите руски рафинерии – КИНЕФ во Кириши, Ленинградска област. Сателитскиот систем на НАСА за следење пожари регистрирал повеќе огнени жаришта во индустриската зона, што укажува на сериозни оштетувања.
Руското Министерство за одбрана соопшти дека во текот на нападите биле соборени вкупно 289 дронови над различни региони, додека најмалку 18 аеродроми привремено го прекинале сообраќајот поради безбедносни причини. Напади и експлозии се пријавени и во Москва, Воронеж, Казан и на Крим.
Градоначалникот на Москва соопшти дека пет дронови биле пресретнати во близина на главниот град.
Официјална потврда од украинска страна засега нема, но Киев во последните месеци интензивира напади врз воени и индустриски цели длабоко во руската територија.
Според достапните информации, ракетата „Фламинго“ има дострел до околу 3.000 километри и бојева глава од околу еден тон, што овозможува удари на далечни и стратешки цели.
Нападите доаѓаат во чувствителен момент, неколку дена пред воената парада во Москва на 9 мај, што дополнително ги зголемува безбедносните тензии во Русија.
