(Видео) „Експрес за повраќање“: Туристите се преплашени од брзите траекти во Грција

Големите бранови во Егејското Море им задаваат сериозни маки на туристите кои патуваат со брзите траекти меѓу грчките острови. На социјалните мрежи сè почесто се појавуваат снимки од патници кои се борат со морската болест, а некои од брзите линии веќе го добија неславниот прекар „Експрес за повраќање“.

Причината е комбинацијата од големата брзина на пловилата, нивната конструкција и силниот летен ветер, мелтеми, кој може да создаде високи бранови. Брзите траекти низ Егејското Море достигнуваат брзина и до 100 километри на час, што значително го скратува патувањето, но во немирно море може да предизвика силно нишање.

— реклама —

„Пред една недела патував со таканаречениот „Експрес за повраќање“ од Атина до Наксос и назад. Мој совет до сите кои се чувствителни на бранови е да ги изберат најголемите можни траекти“, напишал патник на социјалната мрежа „Икс“.

— реклама —

Некои патници раскажуваат дека екипажот морал да раздава кесички за повраќање и да им помага на луѓето кои се чувствувале лошо. Една туристка опишала патување од Сирос до Атина, при кое брановите биле толку силни што траектот нагло се подигал и паѓал, додека патниците се бореле со мачнината.

Најизложени се островите во Кикладите, меѓу кои се Миконос, Наксос и Милос, каде што мелтеми често е силен токму во текот на главната туристичка сезона.

— реклама —

Сепак, експертите предупредуваат дека впечатокот создаден на социјалните мрежи може да биде претеран. Бројот на патници во Грција значително се зголемил, па со тоа се зголемил и бројот на луѓе кои можат да имаат непријатно искуство при немирно море.

Според податоците на Грчката централна банка, бројот на патници од јануари до мај бил за 21 отсто поголем во споредба со истиот период минатата година.