(Видео) Емотивно збогување на Јаник Синер со тренерот Дарен Кејхил: „Многу од она што сум, ти го должам тебе“

Италијанскиот тенисер Јаник Синер со емотивна порака се збогуваше со тренерот Дарен Кејхил, со кого соработуваше од 2022 година и заедно ги направија најголемите чекори во неговата кариера.

Синер објави видео на социјалните мрежи во кое се потсети на почетоците на нивната соработка, како и на односот што со текот на времето го изградиле.

— реклама —

„Кога почнавме да работиме заедно во 2022 година, бев само слаб млад Италијанец со многу прашања. Никогаш не ми ги даваше сите одговори, туку ми помагаше сам да ги пронајдам. Дојде како еден од моите тренери, но многу брзо стана многу повеќе од тоа – човек на кого можам да му верувам и на кого да се потпрам, пријател“, напиша Синер.

Тој се потсети на големите успеси што ги постигнале заедно, меѓу кои првата гренд-слем-титула во Мелбурн, првото место на светската ранг-листа и триумфот на Вимблдон. Сепак, нагласи дека трофеите не се она по што најмногу ќе ја памети нивната соработка.

— реклама —

„Најмногу ќе ми недостигаат долгите часови на тренинзите, патувањата, вечерата, смеата, па дури и деновите кога сè беше тешко. Секогаш знаев дека сум во сигурни раце. Со тебе бевме повеќе од тим“, порача тенисерот.

Синер истакна дека од Кејхил научил многу и надвор од тенисот – дека спортот е важен, но не е сè, дека добриот играч пред сè треба да биде добар човек и дека сложените работи понекогаш можат да бидат едноставни.

Со доза хумор додаде дека се надева оти и тој го научил тренерот на нешто, како, на пример, како да удира топче за голф. Призна дека ќе му недостига моментот по освоен поен да погледне кон ложата и да го види таму.

— реклама —

Иако последната заедничка сезона не завршила онака како што посакувале, Синер нагласи дека тоа не ги менува постигнатите успеси и значењето на нивната соработка.

На крајот, му се заблагодари и на семејството на Кејхил што го споделувало времето со него, истакнувајќи дека голем дел од човекот и тенисерот што е денес му го должи токму на својот тренер.

— реклама —

„Пет сезони. Нема да заборавам ниту еден ден. Ти благодарам, пријателе, за сè. Ми беше привилегија“, порача Синер.