Претседателот на СДСМ, Венко Филипче, на денешната седница за пратенички прашања упати серија критики до премиерот Христијан Мицкоски, обвинувајќи ја Владата за неспособност, корупција и влошување на животниот стандард на граѓаните.
Филипче оцени дека, и покрај владините тврдења, јавноста сè повеќе ја препознава, како што рече, неспособноста и коруптивните практики на власта.
Тој посочи дека институциите немаат соодветен одговор за случаите со загадена вода во повеќе градови и општини, нагласувајќи дека граѓаните не добиваат јасни информации за потенцијалните ризици по нивното здравје.
„Водата е загадена во повеќе места, а јавноста сè уште нема одговор кој е одговорен, дали биле спроведени контроли и зошто резултатите не биле навреме објавени“, рече Филипче.
Лидерот на СДСМ побара Владата да ги објави резултатите од анализите на водата во Гостивар, оценувајќи дека различните изјави од надлежните институции создаваат дополнителна неизвесност кај граѓаните.
Осврнувајќи се на случајот со Лепенец и водоснабдувањето на Скопје, Филипче рече дека јавноста и понатаму нема доволно информации, иако станува збор за подрачје поврзано со изворите за водоснабдување на главниот град.
Во своето обраќање тој се осврна и на економската состојба, наведувајќи дека животниот стандард на граѓаните се влошува, додека цените растат, а платите, според него, стагнираат.
„Граѓаните живеат на работ на егзистенцијата. Сите цени се зголемија, а нема најави за повисоки плати и подобар стандард“, истакна Филипче.
Тој ја критикуваше и состојбата во борбата против корупцијата, повикувајќи се на, како што рече, последните оценки на Европскиот парламент, според кои има забелешки за справувањето со корупцијата и независноста на судството.
Филипче ја оспори и намерата на Владата да предложи закон со кој, според него, би се заобиколиле правилата за јавни набавки при трошење на јавни средства.
Во делот посветен на евроинтеграциите, претседателот на СДСМ оцени дека Владата ги демантира сопствените ставови изнесувани во изминатиот период, обвинувајќи ја дека не покажува вистинска посветеност на европскиот пат на државата.
На крајот од своето обраќање, Филипче му постави директно прашање на премиерот Мицкоски, барајќи од него да каже кој ја сноси политичката одговорност за состојбите во државата.
„Кој премиер е крив за сите овие работи во државата? Граѓаните знаат кој ја носи одговорноста, но сакам тоа да го слушнам и од вас“, порача Филипче.
