Претседателот на СДСМ, Венко Филипче, на денешната прес-конференција повторно реагираше на најавите за изградба на центри за податоци, оценувајќи дека ваквите проекти може да значат голема потрошувачка на вода и електрична енергија, без да донесат значаен број работни места.
Филипче посочи дека СДСМ не е против технолошкиот развој, туку, како што рече, против реализација на проекти за кои смета дека се поврзани со приватни бизнис-интереси на власта и на премиерот Христијан Мицкоски.
Тој повторно го постави прашањето за наводното обезбедување дозволи за користење вода од реката Вардар за потребите на центар за податоци, посочувајќи дека не е јасно како приватна компанија би можела да располага со воден ресурс од значење за земјоделството.
„Како може приватна компанија да располага со водата од Вардар? Што ќе се случи со земјоделството и од каде земјоделците ќе ги наводнуваат плодните површини ако водата се користи за центри за податоци?“, праша Филипче.
Според него, дополнително треба да се разјасни колкави количества вода ќе се користат за ладење на објектите, како и во каква состојба водата би се враќала во речното корито и какви би биле последиците врз животната средина.
Филипче се осврна и на потребите од електрична енергија, прашувајќи дали државата има доволен капацитет за снабдување на вакви објекти и дали нивната потрошувачка би можела да влијае врз цената на електричната енергија за граѓаните.
Тој праша и дали изградбата на центрите за податоци би можела да влијае врз можноста во нивната околина да се развиваат фабрики и други производствени капацитети.
„Каква корист ќе има Македонија од центри за податоци што ќе ги трошат нашите природни и енергетски ресурси, ќе создаваат бучава, а ќе вработуваат само двајца или тројца луѓе? Кои се придобивките, кои се ризиците и што се крие зад овие зделки?“, праша Филипче.
Претседателот на СДСМ оцени дека водата, земјата и енергетските ресурси треба да се користат во интерес на граѓаните, земјоделците и економијата.
„Македонија треба технолошки да се развива, но во интерес на граѓаните, земјоделците и економијата, а не за приватните интереси на Христијан Мицкоски и луѓето блиски до власта“, порача Филипче.
