Венко Филипче со порака до Левица дека евентуално обединување на опозицијата може да се случи само доколку партијата ги промени своите политики и се откаже од, како што рече, своите „ментори и финансиери“.
Филипче, зборувајќи за повиците за обединување на опозицијата, ја нарече Левица „прокси партија на Христијан Мицкоски“ и порача дека обединувањето може да се случи само со и зад Социјалдемократскиот сојуз на Македонија.
„Гледаме дека и прокси партијата на Христијан Мицкоски, тоа е Левица, се согласува за избори и повикува на некакво обединување на опозицијата. Обединувањето може да биде само со и зад Социјалдемократскиот сојуз на Македонија“, рече Филипче.
Тој оцени дека Левица е „проруска партија“, посочувајќи го и транспарентот „НАТО се убијци“, кој, како што рече, бил истакнат во Собранието.
„Поради тоа што Левица е партија којашто е проруска партија, којашто имаше јасен транспарент дека НАТО се убијци во Собранието, и доколку го кажат и доколку ги сменат своите политики и се откажат од своите ментори и финансиери – мајка Русија и татко Христијан Мицкоски – и тие се добредојдени во Фронтот за вистина и правда“, изјави Филипче.
Тој порача дека Левица треба да се откаже од, како што наведе, досегашните позиции во однос на НАТО и Европската Унија.
„Нека се откажат, нека кажат дека НАТО е добро за земјата и дека се за Европската Унија, затоа што Европа и проевропските политики и патот напред кон Европа е тоа што е главен постулат на нашиот Фронт за вистина и правда“, додаде Филипче.
