(Видео) Филипче до Мицкоски и Славески: Кој ќе одговара за блокираните пари на илјадници граѓани?

Претседателот на СДСМ, Венко Филипче, побара премиерот Христијан Мицкоски и гувернерот на Народната банка, Трајко Славески, да одговорат кој ќе сноси одговорност за недостапноста на парите на илјадници граѓани кои имаат сметки во „Алта банка“.

— реклама —

Филипче тврди дека граѓаните не можат да располагаат со сопствените средства, бидејќи експозитурите на банката се затворени, а платежните картички не функционираат. Тој посочи дека, иако претходно било најавено дека клиентите ќе можат да повлекуваат околу 150 евра неделно, во пракса не можат да дојдат до своите пари.

Лидерот на СДСМ го критикуваше и повикот од гувернерот граѓаните да продолжат да ги отплаќаат кредитите, иако немаат пристап до средствата на своите сметки. Според него, тоа е особено проблематично за оние кои зависат од парите што ги имаат во банката за да ги подмират месечните обврски.

— реклама —

Филипче потсети дека околу 11.000 пензионери ги примаат пензиите преку „Алта банка“ и предупреди дека недостапноста на средствата ја загрозува егзистенцијата на пензионери, работници и семејства. Тој изрази загриженост и за граѓаните кои, како што рече, со години ги вложувале своите заштеди во поранешна Стопанска банка Битола.

— реклама —

Тој побара Мицкоски и Славески да одговорат дали било проверено потеклото на капиталот пред влезот на „Алта банка“ во Стопанска банка Битола, дали имало трансакции по завршувањето на изборите во Србија и дали српскиот бизнисмен Давор Мацура престојувал во Македонија во изминатите денови.

Филипче побара објаснување и за трансакциите што, според него, се вршат меѓу правни лица во банката, додека средствата на граѓаните се недостапни. Доколку надлежните не одговорат на овие прашања, тој побара Обвинителството итно да се вклучи и да ги истражи околностите околу случајот.

— реклама —