(Видео) Филипче: Другите одат кон ЕУ, нас нè нема – до кога ќе чекаме гаранции?

Претседателот на СДСМ и претседател на Националниот совет за евроинтеграции, Венко Филипче, побара појаснување за тоа до кога Македонија ќе чека на најавуваните гаранции за напредок во преговорите со Европската Унија.

На средба со делегација на Сенатот на Франција во Собранието, Филипче рече дека СДСМ би поддржал подобри услови за преговарање и механизми што би спречиле нови блокади, но оцени дека досега нема видливи резултати од владините најави.

— реклама —

Тој посочи дека времето поминува и побара одговор што ќе се случи доколку такви гаранции не бидат обезбедени.

— реклама —

Филипче се осврна и на изјавите на претседателката на Европската комисија, Урсула фон дер Лајен, според кои Црна Гора, Албанија, Молдавија и Украина се споменуваат како земји со изгледи за членство до крајот на мандатот на актуелната Комисија. Според него, Македонија не е меѓу наведените земји.

Тој предупреди и на можните последици од продолженото одложување, вклучително и врз идното буџетирање и претпристапната финансиска поддршка од ЕУ.

— реклама —

Филипче изрази загриженост и околу владеењето на правото и односот кон медиумите, оценувајќи дека тие прашања се поврзани со продолжувањето на европскиот пат.

На средбата ја потврди определбата на СДСМ за европска интеграција и ја истакна поддршката од Франција за процесот.