(Видео) Филипче: Еве го документот, зошто новото задолжување го нема во ребалансот, дали ќе се прекрши законот

Венко Филипче побара објаснување од Владата зошто планираното ново задолжување од 1,3 милијарди евра не е содржано во ребалансот на буџетот, иако, како што тврди, информацијата за потребата од задолжување била разгледана на владина седница на 31 август.

Претседателот на СДСМ денеска го покажа документот за кој вели дека се однесува на планираното задолжување и праша дали со изоставувањето на сумата од ребалансот се отвора можност за прекршување на Законот за буџет.

— реклама —

„Зошто новото задолжување, коешто го најави и коешто поминало како потреба на владината седница на 31 август, го нема во ребалансот? И дали со тоа планираат да го прекршат Законот за буџет?“, праша Филипче.

Тој побара одговор и за, како што рече, долг од 350 милиони евра на Јавното претпријатие за државни патишта, за кој гарантира Владата, а кој според него не е прикажан во официјалните податоци за јавниот долг.

— реклама —

Филипче предупреди дека со дополнителното задолжување вкупниот долг на државата би достигнал речиси 12 милијарди евра, а неговиот удел во бруто-домашниот производ би се зголемил на околу 65 проценти.

— реклама —

„Над 4 милијарди евра се нов долг само во изминатите две и пол години од власта на Христијан Мицкоски. И со тоа, долгот ќе порасне на 65 проценти, повторно рекордни, од бруто-домашниот долг“, изјави лидерот на СДСМ.

Според Филипче, Владата нема доволно јасна економска стратегија и план за тоа како задолжувањето би придонело за подобрување на животниот стандард.

„Оваа власт едноставно ниту има капацитет, ниту стратегија, ниту план, ниту желба да направи нешто добро за граѓаните. Само брутално задолжување и проекти коишто не се инвестираат во капитални инвестиции“, рече Филипче.