Претседателот на СДСМ, Венко Филипче, на денешната прес-конференција предупреди дека недостигот во Фондот за пензиско и инвалидско осигурување за две години е двојно зголемен и, според неговите тврдења, достигнал една милијарда евра.
Филипче, говорејќи на трибината „За достоинствен живот и подобра иднина на сите генерации“, во организација на Општинската организација на СДСМ Аеродром, оцени дека состојбата со Фондот за ПИОМ создава ризик за исплатата на пензиите.
„Дупката во Пензискиот фонд, која за две години е дуплирана, од 500 милиони евра, сега е милијарда евра, милијарда евра фалат за да се исплатат пензиите. Ги нема во Пензискиот фонд. Треба да ги даде државата. Кога економијата не работи, од каде ќе ги најде парите? Од заеми“, рече Филипче.
Тој воедно посочи дека продолжува да се зголемува и дефицитот во централниот буџет. Според него, задолжувањето ќе биде главниот начин за обезбедување средства за сервисирање на буџетските обврски, вклучително и за исплата на плати и пензии.
„Единствен извор на средства се само скапи заеми, скапи заеми со кои што ќе се пополнуваат дупките во Буџетот, за да се дадат плати, за да се дадат пензии. Никако скапи заеми кои што ќе придонесат за некаков раст на економијата“, изјави Филипче.
Тој предупреди дека, според него, ваквата состојба може да доведе до продлабочување на економските проблеми и посочи на ризик од економска криза.
Филипче ја поврза економската состојба и со политиката на Владата кон европските интеграции. Тој оцени дека оддалечувањето од европскиот пат може да значи и помалку можности за европско финансирање.
„А ако кај нас ги снема европските пари, а постепено ги снемува, и уште помалку ќе ги има, и што ќе се случи? Ќе продолжи овој систем кој што сега се случува, а тоа е да сме доведени во ситуација да е единствен извор на средства ни се само скапи заеми“, рече Филипче.
