Додека пациентите се соочуваат со недостиг на лекови, листи на чекање и проблеми со условите за лекување, власта најавува нови контроли на боледувањата, реагираше претседателот на СДСМ, Венко Филипче на денешната прес-конференција.
Одговарајќи на новинарско прашање на денешната прес-конференција, Филипче ја критикуваше најавата за проверки и скратување на времетраењето на боледувањето, оценувајќи дека неговата должина треба да се определува врз основа на медицински критериуми.
„Не може боледувањето да ви е домашен притвор. Што ќе проверува полицијата? Дали сте ја земале терапијата?“, праша Филипче.
Тој рече дека е потребно да се санкционираат злоупотребите на боледувањата, но оцени дека најавените измени не ги решаваат суштинските проблеми во здравството. Филипче ја доведе во прашање и најавата боледувањето да биде ограничено на пет дена.
„Како тоа му текнало на него пет? Врз основа на што? Па уште полиција ќе праќа дома да проверува дали си дома или не си дома“, изјави Филипче.
Според него, додека се најавуваат мерки за контрола на граѓаните, пациентите продолжуваат да се соочуваат со недостиг на лекови, несоодветни услови за лекување и долги листи на чекање.
Филипче зборуваше и за набавките на медицинска опрема, при што изнесе тврдење за влијание од највисоките кругови на власта. Тој рече дека советник на премиерот ги посетувал клиниките и им кажувал на директорите какви спецификации и опрема да набавуваат.
„Има еден советник на премиерот којшто шета по клиниките и им кажува на директорите која спецификација и која опрема да ја купат“, изјави Филипче, најавувајќи дека за ваквите случаи ќе има одговорност.
