(Видео) Филипче: Македонија не е на продажба – Мицкоски нема право да ги распродава земјата, рудите и водата!

Претседателот на СДСМ, Венко Филипче, на денешната прес-конференција обвини дека Владата предводена од Христијан Мицкоски планира да ги отстапува природните ресурси на земјата на странски инвеститори, оценувајќи дека за отворањето рудници мора да има одлука од граѓаните во местата каде што би се реализирале такви проекти.

На прес-конференција, Филипче порача дека земјата, рудното богатство и водните ресурси не може да се третираат како приватна сопственост и побара граѓаните да бидат вклучени во одлуките за идни рударски проекти.

— реклама —

„Мицкоски најавува распродавање на земјата и ги нуди рудните богатства на странски инвеститори. Јасно и гласно му порачувам: не смее да ги распродава националните богатства. За отворање рудници прво мора да бидат прашани граѓаните“, изјави Филипче.

Според него, жителите на населените места во чија близина се планираат рудници треба преку референдум да се изјаснат дали ги прифаќаат проектите.

— реклама —

Филипче го поврза прашањето за рударството и со состојбата со водоснабдувањето во повеќе делови од земјата, изразувајќи загриженост за можните последици врз водните ресурси.

„Во време кога илјадници граѓани во Гостивар беа затруени од загадена вода, кога и во Струмичкиот регион има места со неисправна вода, кој може да гарантира дека токсични материи, како антимонот, утре нема да завршат во водата? Такви одлуки не смеат да се носат зад грбот на граѓаните“, рече тој.

Претседателот на СДСМ истовремено ја критикуваше економската политика на Владата, тврдејќи дека природните ресурси не треба да бидат решение за економските проблеми.

— реклама —

Тој се осврна и на најавите за изградба на центри за податоци, при што побара од власта да објави повеќе информации за планираната потрошувачка на вода и електрична енергија, како и за влијанието врз земјоделството и користа за граѓаните.

„Ние не сме против технолошкиот развој на државата. Ние сме против приватните бизнис-интереси на оваа власт да се остваруваат на штета на граѓаните. Водата од Вардар, земјата и рудите им припаѓаат на сите граѓани, а не на приватни компании и луѓе блиски до Мицкоски“, изјави Филипче.

— реклама —

Тој повтори дека граѓаните треба да имаат можност да одлучуваат за рударски проекти во нивната непосредна околина и порача дека природните ресурси треба да се третираат како национално богатство.