(Видео) Филипче: Мицкоски е очаен, брутално ја задолжува земјата со над 65% од БДП

Претседателот на СДСМ, Венко Филипче, излезе со остри критики кон економската политика на Владата, обвинувајќи го премиерот Христијан Мицкоски за прекумерно задолжување и предупредувајќи дека јавниот долг би можел да достигне рекордни нивоа.

Филипче тврди дека со најавеното ново задолжување од 1,3 милијарди евра, вкупниот долг на државата би достигнал речиси 12 милијарди евра, односно околу 65 проценти од бруто-домашниот производ.

— реклама —

„Колку треба да биде очаен човек да каже дека расте бруто-домашниот производ, а при тоа, секојдневно, брутално и сè повеќе ја задолжува земјата. Затоа што, ако економијата добро работи, тогаш ќе се задолжуваме со помалку пари и вкупниот долг ќе се намалува, а нема да се зголемува“, рече Филипче.

Според лидерот на СДСМ, во изминатите две и пол години новото задолжување надминало четири милијарди евра.

— реклама —

„Еве го документот со кој поминала информација и потреба за задолжување на земјава со нови 1,3 милијарди евра. Повторувам, 1,3 милијарди евра. Нов долг. Со којшто вкупниот долг ќе порасне на досега рекордни, никогаш достигнати, скоро 12 милијарди евра“, изјави Филипче.

Тој оцени дека зад задолжувањето нема јасна економска стратегија или политики што ќе придонесат за подобар животен стандард на граѓаните.

— реклама —

„Оваа власт едноставно ниту има капацитет, ниту стратегија, ниту план, ниту желба да направи нешто добро за граѓаните“, рече Филипче.

Претседателот на СДСМ ја обвини Владата дека средствата не ги насочува доволно кон капитални инвестиции, туку, како што тврди, кон партиски тендери.

Филипче ја обвини и Владата дека со, како што ги нарече, „лажни податоци“ ги претставува сопствените неуспеси како економски успеси, додавајќи дека граѓаните најдобро ја чувствуваат состојбата преку трошоците за живот.