(Видео) Филипче: Сега сите знаат дека Владата на Мицкоски е под истрага за унгарскиот кредит

Претседателот на СДСМ, Венко Филипче, денеска на прес-конференција го критикуваше начинот на кој Владата го користи заемот од една милијарда евра од Унгарија, тврдејќи дека кредитот е предмет на истрага и дека случајот веќе предизвикува внимание и надвор од земјава.

„Сега цела Европа и цел свет знае дека Владата, на чело со Христијан Мицкоски, е под истрага и се сомневаат во нелегални процеси“, рече Филипче.

— реклама —

Тој изнесе и тврдење дека Соединетите Американски Држави, како стратешки партнер на Македонија, знаат за, како што рече, прилив на кинески пари во земјата преку заемот од Унгарија, како и за најавите за нови проекти во општините.

Филипче побара од Владата да одговори каде се потрошени средствата од унгарскиот заем и каков конкретен ефект почувствувале граѓаните.

— реклама —

„Каде се парите од унгарскиот кредит? Што видовме ние од унгарскиот кредит? Што видоа граѓаните? Им се подобрил стандардот? Имаше ли зголемување на платите?“, праша тој.

Според лидерот на СДСМ, наместо подобрување на животниот стандард, граѓаните се соочуваат со зголемување на цените, особено на храната.

Филипче ја критикуваше и политиката на задолжување на Владата, оценувајќи дека не е логично да се зборува за добра економска состојба, а истовремено јавниот долг постојано да расте.

— реклама —

„Не можете да кажете дека добро работи Владата, дека економијата добро функционира, дека има раст на бруто-домашниот производ, а се задолжуваме сè повеќе и повеќе“, рече Филипче.

Тој посочи дека Владата планира дополнително задолжување од 1,3 милијарди евра, со што, според неговите пресметки, новиот долг за нешто повеќе од две години би достигнал речиси четири милијарди евра.

„Скоро четири милијарди евра. Нов долг. За само две години и неколку месеци од Владата на Христијан Мицкоски“, рече претседателот на СДСМ.