Претседателот на СДСМ, Венко Филипче, денеска на прес-конференција го критикуваше новиот просторен план, тврдејќи дека со него се предвидува отворање пет нови рудници во Македонија.
Според Филипче, во планот се опфатени Иловица–Штука, Казандол, Плавица, Кадиица и Луке, а како дополнителен простор опфатен со планирани геолошки истражувања ја посочи и планината Кожув.
Тој побара повлекување на документот, предупредувајќи на можни последици врз почвата, водите и здравјето на населението во регионите каде што се планираат рударски активности.
Филипче посочи дека просторниот план е изготвен од Министерството за животна средина и Агенцијата за просторно планирање и дека денеска за првпат бил презентиран на јавна дебата во Струмица. Според него, потоа се предвидени јавни дебати и на уште осум места во државата.
Како спорни ги посочи и Казандол и Иловица, за кои тврди дека во претходната планска стратегија не биле означени за рударска намена.
Дополнително, Филипче се осврна на владината одлука за концесија за геолошки испитувања во регионот „Исток“, за која рече дека опфаќа широко подрачје од 27 општини, вклучително и планината Кожув.
„Сакам да им порачам Македонија не е на продажба. Нема да го ризикуваме здравјето на граѓаните за туѓи профити“, порача Филипче, повикувајќи ја власта да се повлече од планот.
Тој најави дека СДСМ ќе се спротивставува на планот на сите јавни дебати, а доколку, како што рече, власта не отстапи, најави и физички блокади на местата каде што се планираат рударски активности.
