СДСМ и коалицијата денеска ќе поднесат предлог-закон за финансиска поддршка на земјоделците, со кој се предлага дополнителна помош за повеќе земјоделски производители. Според претседателот на СДСМ, Венко Филипче, мерките се подготвени врз основа на барањата на земјоделците и проблемите со откупот и ниските откупни цени.
За лозарите се предлага финансиска поддршка од 8 денари за секој килограм произведено и продадено грозје од сортите „Вранец“ и „Кратошија“. За оние кои нема да успеат да го продадат грозјето, предвидена е дополнителна поддршка од 300.000 денари по хектар евидентиран лозов насад.
Предлогот предвидува и 10 денари за килограм продадена ајварка, како и дополнителни 200.000 денари по хектар засадена површина.
За производителите на пченица се предлага поддршка од 5 денари за килограм, без оглед дали пченицата е продадена кај регистриран откупувач или е складирана во евидентиран склад.
Опфатени се и сточарите, за кои се предлага помош од 8.000 денари по грло добиток. Услов е тие да биле опфатени со програмата за 2025 година и да бидат евидентирани и за 2026 година.
За оризопроизводителите се предлага поддршка од 10 денари за килограм произведена и продадена оризова арпа кај регистриран откупувач во 2026 година.
Филипче посочи дека помошта би била дополнување на редовните директни плаќања и другите мерки за 2026 година, а исплатата преку Платежната агенција, според предлогот, треба да заврши најдоцна до 31 декември.
Тој нагласи дека со предлог-законот се опфаќаат и производителите кои не можат да го пласираат својот род, особено лозарите, за кои, како што рече, субвенциите не се доволни доколку нема откуп.
