(Видео) Ѓорѓиевски: Распишан тендерот за предквалификација за брз автобуски превоз во Скопје

По повеќегодишните најави и подготовки, проектот за брз автобуски превоз (БРТ) во Скопје влегува во нова фаза. Градоначалникот на Скопје, Орце Ѓорѓиевски, информираше дека во соработка со Европската банка за обнова и развој (ЕБОР) е распишана тендерска постапка за предквалификација за проектот.

Според Ѓорѓиевски, заинтересираните компании од Македонија и регионот ќе можат да аплицираат до 2 ноември, а тој ги повика компаниите да се пријават за да се обезбеди поголема конкуренција.

— реклама —

„Конечно, една од трите важни работи за скопјани поврзани со градскиот транспорт доаѓа до својот фотофиниш, а тоа е БРТ-то“, рече Ѓорѓиевски.

Тој посочи дека во изминатиот период биле надминувани повеќе пречки и предизвици поврзани со проектот, при што ја истакна соработката со ЕБОР, тимот на Град Скопје и поддршката од Владата.

— реклама —

— реклама —

Ѓорѓиевски потсети и на постапката за набавка на 100 нови автобуси, за која, како што наведе, е завршена постапката и веќе тече рокот за испорака. Дополнително, тој го спомена и создавањето градски воз и железнички транспорт во рамките на Скопје, посочувајќи дека првата фаза од тој процес е завршена.

Според него, овие проекти треба да создадат предуслови за модерен градски транспорт, со повеќе можности за граѓаните и поголем удел на еколошкиот превоз.

Ѓорѓиевски изрази очекување дека до крајот на неговиот мандат скопјани ќе можат да го користат и БРТ-системот.