Патниците на летот на „Рајанер“ од Солун кон Минхен доживеале вистинска драма откако, според грчките медиуми, за време на летот пукнал прозорец на авионот, што предизвикало декомпресија во кабината. Поради инцидентот, авионот се вратил на аеродромот „Македонија“ во Солун.
Според информациите, веднаш се активирале маските за кислород, а авионот започнал нагло да ја намалува висината. Патниците раскажуваат дека во кабината настанала паника, а многумина мислеле дека некој ја отворил вратата за итни случаи.
Особено драматични биле моментите околу 61-годишен српски државјанин, кој седел до оштетениот прозорец. Сведоци тврдат дека неговото тело делумно било извлечено надвор од авионот, но благодарение на безбедносниот појас и брзата реакција на сопругата и останатите патници, тој бил извлечен назад во кабината.
„Се слушна силен тресок, како да пукна гума. Луѓето почнаа да врескаат, а поради декомпресијата авионот веднаш почна да се спушта. Сите ги ставивме маските за кислород“, изјавила една патничка за локално радио.
Претседателот на Федерацијата на болнички работници на Грција, Михалис Јанакос, случајот го опиша како „замалку избегната трагедија“.
Повредениот патник бил пренесен во болницата АХЕПА во Солун, каде што му биле констатирани повреди на вратот и изгореници од триење, но бил свесен.
Во болница превентивно била пренесена и бремена патничка. По извршените прегледи и ултразвук, таа била пуштена на домашно лекување, бидејќи не биле утврдени компликации.
