(Видео) Го спасиле коњот од изнемоштеност, но повторно го земале истите лица - активисти од Кавадарци бараат институционална реакција

Коњот кој, според сведоштвата на активистите, бил изложен на малтретирање и во тешка состојба паднал на улица во Кавадарци, повторно бил земен од лицата кои претходно го користеле, иако по интервенцијата требало да биде згрижен на друга локација. Ова го соопшти здружението за заштита на животните „Лина“, кое најавува дека ќе продолжи да бара институционална реакција за случајот.

Од здружението тврдат дека животното било крајно истоштено, гладно и жедно, без соодветна грижа, а немало ниту потковици. Според нивните наводи, коњот паднал од изнемоштеност, но наместо да му биде укажана помош, врз него било применувано насилство во обид повторно да биде кренат на нозе.

Активистите наведуваат дека благодарение на интервенцијата на неколку граѓани коњот бил ослободен од железните конструкции и ремените со кои бил врзан, по што му биле дадени храна и вода.

— реклама —

„Поради поединци кои сè уште постојат, оваа срцепарателна глетка заврши со тоа што коњот во последен момент беше вратен во живот“, наведуваат од „Лина“.

Од здружението информираат дека случајот бил пријавен во полиција, по што полициски службеници излегле на терен и составиле записник. Според нив, за настанот била известена и Агенцијата за храна и ветеринарство.

— реклама —

Сепак, како што тврдат активистите, и покрај интервенцијата и дадените насоки за понатамошно постапување, коњот не се наоѓа на локацијата каде што требало да биде згрижен.

— реклама —

„Коњот, за жал, и покрај наредбата од полицијата и помошта од хуманите луѓе кои буквално му го спасија животот, не е на локацијата каде што требаше да биде. Повторно е земен од оние кои го користат за свои потреби“, соопштија од „Лина“.

Здружението изразува загриженост дека животното повторно може да биде изложено на истите услови и најавува дека нема да се откаже од случајот.

„И покрај истоштеноста и огромната горчина поради проблемите во Кавадарци со несовесните сопственици и злоупотребите од поединци кои ги малтретираат животните, ќе одиме до крај за овој случај“, порачуваат активистите.

Тие апелираат до граѓаните да помогнат во заштитата на животното и бараат надлежните институции да преземат мерки со кои ќе се спречи негово натамошно малтретирање.

Засега нема официјална потврда од полицијата и Агенцијата за храна и ветеринарство за моменталната локација на коњот, неговата здравствена состојба и мерките што се преземени по пријавата.