Неколку јагленосани тела се пронајдени по големиот пожар што избувна во зграда во центарот на Брисел, додека најмалку шест лица сè уште се водат како исчезнати, јавуваат белгиските медиуми, повикувајќи се на локалните власти.
Според првичните информации, телата биле пронајдени во еден од лифтовите во зградата, која била во фаза на реконструкција. Пристапот до вториот лифт првично бил невозможен, поради што спасувачките екипи не ја исклучуваат можноста таму да има уште жртви.
Во пожарот се повредени најмалку три лица, а уште двајца со изгореници се пренесени во болница. Еден пожарникар добил лекарска помош на местото на настанот поради топлотен удар.
Пожарот избувнал утринава во зградата „Окси“ на плоштадот Брукер во центарот на Брисел. Според канцеларијата на јавниот обвинител, во моментот на избувнувањето на пожарот во објектот имало околу 250 градежни работници кои работеле на поставување лифтови.
Пламенот избувнал на вториот кат, а потоа преку отворот за лифт се проширил кон подрумот, предизвикувајќи пожар од големи размери. Спасувачките екипи продолжуваат со пребарување на лифтовските шахти и останатите делови од објектот во потрага по евентуално заробени лица.
Причината за пожарот засега не е позната, а истрагата е во тек.
