Неколку големи пожари вчера избувнаа во различни делови на Грција, при што најсериозна е состојбата на островот Крит и во централниот дел на земјата. Стотици пожарникари, потпомогнати од авиони и хеликоптери, се ангажирани во напорите за локализирање на огнената стихија.
Во Ираклион на Крит, пожарот започнал во складиште за дрва, а според првичните информации, огнот најверојатно избувнал кај дрвените палети и брзо се проширил поради големото количество запалив материјал. Во пожарот биле зафатени најмалку четири куќи и две деловни згради, а пламените јазици се прошириле и кон околните објекти.
Иако пожарникарите соопштија дека ситуацијата е делумно ставена под контрола, пожарот сè уште не е целосно изгаснат. Густ чад се издигна над поширокото подрачје на Ираклион и беше видлив од повеќе делови на градот, предизвикувајќи загриженост кај жителите.
По избувнувањето на пожарот, бил активиран системот за итно предупредување, преку кој граѓаните биле повикани да останат во своите домови и да ги затворат вратите и прозорците. Во интервенцијата на Крит учествувале 95 пожарникари со 18 возила и еден хеликоптер, додека Националниот координативен центар за операции и управување со кризи постојано добивал снимки од дронови со оптички и термални камери.
Во меѓувреме, уште еден голем пожар избувнал во близина на Орхоменос во централна Грција, каде што огнот зафатил земјоделски и шумски површини. На терен се распоредени 105 пожарникари со 25 возила, а во гаснењето периодично се вклучуваат и десет авиони и три хеликоптери.
Пожарот кај Орхоменос избувнал во попладневните часови, недалеку од населено место, а надлежните служби започнале истрага за утврдување на причините за неговото избувнување.
