(Видео) Град со големина на човечка дланка го погоди Парагвај: Невремето оштети куќи и автомобили

Силно невреме проследено со крупен град во саботата попладне и навечер го погоди Асунсион, главниот град на Парагвај, како и повеќе градови во департманот Централ. Големите ледени топки оштетиле покриви и автомобили, а невремето предизвикало и прекини во снабдувањето со електрична енергија.

Невремето зафатило повеќе населби во Асунсион, меѓу кои Санта Ана, Барио Обреро, Пиноса и централното подрачје. Град паѓал и во градовите Њемби, Фернандо де ла Мора, Сан Лоренсо, Ламбаре и Луке.

На социјалните мрежи граѓаните објавувале снимки и фотографии од последиците. На повеќе возила биле искршени предните и задните стакла, додека на една снимка се гледа како градот пробива лим на покрив од куќа во Асунсион.

— реклама —

Пријавени биле и прекини во снабдувањето со електрична енергија во Асунсион, Ламбаре, Луке, Вила Елиса и Капиата. Националната управа за електрична енергија објавила безбедносни препораки за време на силни грмотевични невремиња.

Особено внимание предизвикала големината на градот. Според директорот на Управата за метеорологија и хидрологија, Едуардо Минго, на некои места ледените зрна достигнувале пет до седум сантиметри, а на одделни локации биле измерени и до 10-12 сантиметри.

— реклама —

Минго објаснил дека за создавањето на ваквото невреме придонеле сезонските услови типични за почетокот на пролетта, во комбинација со екстремните температури и високата влажност.

— реклама —

Тој потсетил и на температурите од околу 44 степени Целзиусови, измерени во регионот Чако кон крајот на септември, при што во Марискал Естигарибија бил соборен температурен рекорд стар 74 години.

Според Минго, високите температури и влажноста создале услови за развој на исклучително нестабилни облачни системи. Дополнителен фактор, како што навел, е и влијанието на Ел Нињо, кое носи повеќе влага и високи температури.

— реклама —

Тој очекува влијанието на Ел Нињо да продолжи најмалку до крајот на март или почетокот на април.