До Општина Куманово се поднесени вкупно 160 барања и известувања од граѓани и правни субјекти за надомест на штетите предизвикани од невремето што го зафати градот на 20 јули.
Од Општината информираат дека најголем дел од пријавите се однесуваат на оштетени фасади, откорнати кровни конструкции на семејни куќи и станбени згради, оштетени покриви, како и штети на возила предизвикани од паднати дрвја и делови од кровови. Пријавени се и поплавени објекти поради атмосферски води, како и штети на земјоделски насади.
Од локалната самоуправа потсетуваат дека рокот за поднесување барања за обештетување истече на 31 јули. Комисијата за проценка и утврдување на штетите досега одржала два состанока на кои ги разгледала сите пристигнати барања.
По извршениот увид на терен и проценката на штетите, Комисијата ќе изготви елаборат-извештај кој ќе биде доставен до надлежната владина комисија за понатамошно постапување.
