(Видео) Хаос во Јужна Африка: Запалени 24 автомобили, ограбени продавници на странци

Насилни протести против мигрантите избувнаа во Јужна Африка, каде што демонстранти запалија најмалку 24 автомобили и ограбија повеќе продавници во сопственост на странски државјани. Немирите ги зафатија градовите Совето и Дурбан, а полицијата интервенираше за да спречи понатамошно насилство, објави „Еуроњуз“.

Во Совето, во близина на канцелариите на Министерството за внатрешни работи во населбата Орландо Вест, биле запалени десет автомобили. Демонстрантите ограбиле и повеќе продавници во сопственост на странци, додека пожарникарите интервенирале за да ги изгаснат запалените возила.

— реклама —

Полицијата ги блокирала околните улици и распоредила дополнителни сили за воспоставување ред.

Слична ситуација имало и во Дурбан, каде што биле запалени 14 автомобили. Специјални полициски единици биле испратени по пријавите за грабежи, подметнати пожари и судири поврзани со антимигрантските протести.

Немирите следуваат по одлуката на Уставниот суд на Јужна Африка од јули, со која се отстрануваат одредени пречки за поднесување барања за азил. Одлуката се однесува и на мигранти кои влегле во земјата без законско одобрение, што предизвикало незадоволство кај дел од населението.

— реклама —

Властите соопштиле дека центрите за прием на бегалци се соочуваат со голем број барања, поради што Владата најавила проширување на капацитетите за нивна обработка и засилени проверки на идентитетот на барателите.

Истовремено, јужноафриканските власти нагласиле дека судската одлука не значи автоматско добивање бегалски статус, туку овозможува пристап до постапката за барање меѓународна заштита.

— реклама —

Според полициските информации, во немирите во Совето нема повредени лица. Полицијата најавила кривично гонење на сите што учествувале во насилството, грабежите и уништувањето имот.

Локалните медиуми јавуваат и за полициски апсења во двата града, додека надлежните продолжуваат да ја следат безбедносната состојба.

Настаните повторно го отворија прашањето за односот кон мигрантите во Јужна Африка, каде што незадоволството од имиграциската политика во повеќе наврати било проследено со насилство насочено кон странски државјани и нивните бизниси.