АФРИКА

Индија бара нафта од Африка и Латинска Америка поради кризата на Блискиот Исток

Индија ги зголемува набавките на нафта од Латинска Америка и Африка за да го надомести намаленото снабдување од Блискиот Исток поради војната и блокадата на Ормускиот Теснец, покажуваат податоци од трговски извори.Рафинериите во третата најголема земја-увозник на нафта во светот во април и мај го зголемиле увозот од Венецуела, Бразил, Ангола и Нигерија, а паралелно продолжиле да купуваат и руска нафта.Индија во април не купувала ирачка нафта поради прекин на извозот, но повторно почнала да увезува иранска нафта по пауза од седум години, откако Вашингтон привремено дозволил купување за стабилизирање на светските цени.Според податоците, увозот на руска нафта во април бил намален за околу 29,4 проценти во однос на март, на 1,6 милиони барели дневно, главно поради одржување на една голема индиска рафинерија. Сепак, Русија останала најголем снабдувач на Индија со нафта.Во мај Индија се очекува да увезува околу 1,9 милиони барели руска нафта дневно и околу 41 илјада барели дневно од Ирак.Податоците покажуваат дека увозот од Обединетите Арапски Емирати речиси се зголемил трипати, додека увозот од Саудиска Арабија останал стабилен. Овие две земји се меѓу ретките производители во Персискиот Залив што имаат нафтоводи кои го заобиколуваат Ормускиот Теснец.Поради кризата, уделот на нафтата од земјите членки на ОПЕК во индискиот увоз пораснал на 45,2 проценти во април, додека уделот на руската нафта паднал од речиси 50 на околу 35 проценти.

Свет | пред 1 седмица

Американски и нигериски сили ликвидирале висок функционер на Исламска држава

Американскиот претседател Доналд Трамп изјави дека американските сили, заедно со вооружените сили на Нигерија, спровеле заедничка операција во која бил убиен Абу-Билал ел-Минуки, за кого тврди дека бил втор човек во глобалната структура на Исламска држава.„Мислеше дека може да се крие во Африка, но не ни претпоставуваше дека имаме извори кои нè информираа за тоа што прави“, напиша Трамп на платформата Truth Social.Тој посочи дека операцијата била „внимателно испланирана и многу сложена“, додавајќи дека Ел-Минуки „повеќе нема да го тероризира народот на Африка, ниту да помага во планирање операции насочени против Американци“.Трамп ѝ се заблагодари и на владата на Нигерија за соработката во акцијата, оценувајќи дека со елиминацијата на Ел-Минуки „глобалната операција на Исламска држава е значително ослабена“.

Свет | пред 3 седмици

Кина нуди помош за Африка поради последиците од војната со Иран

Кинескиот претседател Си Џинпинг најави дека Кина е подготвена да им помогне на африканските држави во справувањето со економските последици од војната меѓу САД и Израел со Иран.Изјавата ја даде за време на средбата во Пекинг со претседателот на Мозамбик, Даниел Чапе, што претставува прва посета на африкански лидер во Кина од почетокот на конфликтот.Си оцени дека последиците од војната веќе се чувствуваат во Африка, особено поради зависноста на многу земји од увоз на гориво, храна и ѓубрива, како и поради нарушувањата во трговијата преку Ормутскиот теснец.„Глобалниот југ, со Кина и Африка како негови претставници, отсекогаш бил сила на правдата во светот кој се соочува со немири. Подготвени сме заедно да се справиме со предизвиците, да го промовираме мирот и да работиме на развојот“, изјави Си.Средбата доаѓа во период на засилени дипломатски активности на Пекинг, пред очекуваната посета на американскиот претседател Доналд Трамп во мај.Во меѓувреме, Кина дополнително ги проширува економските врски со африканските држави преку воведување режим на нулта царина за увоз од 53 земји, мерка што стапува на сила од 1 мај.Во сенка на овие активности, се продлабочуваат и тензиите околу Тајван. Тајванскиот претседател Лаи Чинг-те беше принуден да откаже патување во Африка, откако неколку земји повлекле дозволи за прелет на неговиот авион, што од Тајпеј го оценија како резултат на притисок од Кина.Од Пекинг, пак, им се заблагодарија на овие држави за, како што наведоа, почитувањето на принципот „една Кина“.

Свет | пред 1 месец