Обединетите нации (ОН) предупредија дека актуелната епидемија на ебола во Африка би можела да предизвика економски загуби до 3,6 милијарди американски долари и да доведе до губење на стотици илјади работни места, со ризик здравствената криза да прерасне во поширока развојна криза.
Според податоците на Владата на Демократската Република Конго, од прогласувањето на епидемијата на 15 мај досега се регистрирани 1.307 заразени лица, а 377 лица починале.
Станува збор за ебола предизвикана од сојот Бундибуџо, за кој засега не постои докажано ефикасна вакцина или терапија.
Помал број случаи веќе се регистрирани и во Уганда, а здравствените експерти предупредуваат дека постои опасност болеста да се прошири и во соседните држави, меѓу кои и Јужен Судан.
„Ако ги обезбедиме потребните средства и ги засилиме напорите, можеме да ја ставиме епидемијата под контрола и да спречиме дополнителни загуби“, изјави постојаниот претставник на Програмата за развој на Обединетите нации во Конго, Дамиен Мама.
Од Програмата за развој на ОН предупредуваат дека, доколку не се преземат соодветни мерки, здравствената криза би можела да прерасне во долгорочна развојна криза не само во регионот, туку и на целиот африкански континент.
Според најлошото сценарио на ОН, доколку еболата се прошири во земји како Руанда и Ангола, африканскиот бруто-домашен производ би можел да биде намален за 3,6 милијарди долари, а би можеле да бидат изгубени околу 328.000 работни места.
