Голем чекор во борбата против еболата: Се испитуваат две нови потенцијални вакцини

Две потенцијални вакцини против ебола добија препорака за вклучување во клинички испитувања во Демократска Република Конго, каде што од мај трае епидемија на болеста. Станува збор за тоа првпат да се испитуваат вакцини специјално создадени за заштита од вирусот Бундибуџо, кој е причинител на актуелната епидемија.

— реклама —

Препораката ја дадоа стручни групи свикани од Светската здравствена организација (СЗО), врз основа на достапните претклинички и првични клинички резултати. Станува збор за вакцината „ChAdOx1“, развиена од Универзитетот во Оксфорд и Индискиот институт за вакцини, како и за „mRNA-1469“ на американската компанија „Модерна“.

— реклама —

Според податоците на Министерството за здравство на Конго, од почетокот на епидемијата досега починале 5.026 лица, а повеќе од 10.350 се заразиле.

— реклама —

Генералниот директор на СЗО, Тедрос Аданом Гебрејесус, оцени дека подготвеноста на вакцините за клиничко испитување ја покажува силата на науката и меѓународната соработка. Тој истакна дека вакцините сами по себе нема да ја запрат епидемијата, но би можеле да станат значајна алатка за нејзино ставање под контрола.

— реклама —

Испитувањето го предводи Националниот институт за биомедицински истражувања на Демократска Република Конго, со поддршка од Универзитетот во Антверпен, СЗО и други партнери. Првите резултати од испитувањето на терапиите се очекуваат во наредните месеци, додека резултатите од испитувањето на вакцините се најавени за почетокот на 2027 година.