Епидемијата на ебола во Конго излегува од контрола, заразени се над 11.000 луѓе

Епидемијата на ебола во Демократска Република Конго продолжува да се шири и по шест месеци од нејзиното избувнување, а бројот на заразени надмина 11.000, соопшти организацијата „Лекари без граници“ (MSF).

Станува збор за епидемија предизвикана од реткиот сој Бундибуџо, која веќе е втората најтешка епидемија на ебола досега. За овој сој сè уште нема одобрени лекови ниту вакцини, пренесе „Ројтерс“.

— реклама —

Од MSF предупредуваат дека помошта не стигнува до најзагрозените поради недостиг од обучен и платен медицински персонал, возила на Итната помош без гориво, како и недоволен број тимови за следење на заразата и опрема за безбедно згрижување на лицата кај кои постои сомневање за инфекција.

„И покрај огромните финансиски средства издвоени за справување со епидемијата, многу здравствени работници на првата линија се принудени да се борат против ширењето на вирусот без основни средства и без плата“, изјави меѓународниот претседател на организацијата, Џавид Абделмонеим.

— реклама —

Британскиот епидемиолог Нил Фергусон предупреди дека веројатно се регистрираат само половина од сите случаи на зараза. Според неговата процена, епидемијата би можела да трае уште една година и да ги надмине размерите на епидемијата во Западна Африка од 2014 до 2016 година, кога беа регистрирани повеќе од 28.600 заразени, а над 11.000 луѓе починаа.

— реклама —

Од MSF наведуваат дека речиси две третини од смртните случаи поврзани со ебола во изминатиот месец биле пријавени во заедниците, а не во центрите за лекување. Дополнително, здравствените установи се соочуваат со недостиг од основни залихи, меѓу кои вода и хлор.

Светската здравствена организација признава дека постојат проблеми во справувањето со епидемијата, вклучително и доцнење на исплатата на здравствените работници. Нејзиниот генерален директор Тедрос Аданом Гебрејесус изјави дека СЗО соработува со властите во Конго и други партнери за зајакнување на одговорот на епидемијата.

— реклама —

Како една од најголемите пречки тој ја посочи безбедносната состојба, особено нападите врз здравствените установи. Во нападот минатата недела во местото Кантин-Алоја, во провинцијата Северно Киву, загинале 66 цивили, меѓу кои и тројца здравствени работници.

Поради нападите, изгубена е трагата на повеќе од 1.000 контакти на заразени лица, а не е познато ниту каде се наоѓаат тројца пациенти кај кои е потврдена ебола.