Хаос во шпанската ексклава Сеута при преместување на стотици мигранти од плажите
Стотици мигранти утрово биле преместувани од плажите во шпанската ексклава Сеута во новоизградено привремено прифатилиште, но почетокот на полициската операција бил проследен со хаотични сцени, турканици и повредени лица.
Во акцијата учествувале околу 150 полицајци. Откако во еден момент настанало стампедо при обидот на мигрантите да го пробијат полицискиот кордон, полицијата испукала предупредувачки истрели во воздух. Ситуацијата била ставена под контрола по пристигнувањето на интервентните полициски сили.
Операцијата започнала нешто пред 7 часот, кога стотици мигранти веќе се собрале на плажите. Пред пристигнувањето на поголемиот број полицајци, дел од нив тргнале кон пристаништето, што предизвикало метеж и турканици на шеталиштето.
По првичниот хаос, властите преку разглас повикале на смирување, а полицијата ги распоредила мигрантите во групи долж шеталиштето. Потоа започнало пешачкото преместување кон привремениот прифатен центар во пристаништето, во кое учествувале и припадници на војската и Цивилната гарда.
Новото шаторско населбе има тушеви, кревети и капацитет за околу 1.700 лица. Просторот почнал брзо да се пополнува, а оние за кои немало место морале да се вратат на плажите.
Преместувањето започнало од плажата Бенитез, додека мигрантите на соседните локации останале под полициски надзор.
При акцијата полицајците издвоиле и неколку деца од групата која чекала да биде префрлена кон пристаништето. Новиот прифатен центар е наменет исклучиво за возрасни мажи, поради што властите спречуваат малолетници да бидат сместени заедно со нив.
Во Сеута во моментов нема нови сместувачки капацитети наменети за малолетни лица.
Ситуацијата со мигрантите во Сеута е особено напната по масовното преминување на границата кон крајот на јули. Тогаш на територијата на ексклавата влегле околу 80.000 луѓе. Иако повеќето подоцна се вратиле во Мароко, во Сеута останале илјадници мигранти, меѓу кои и лица кои сакаат да поднесат барање за азил.
Поради состојбата, властите во Мадрид наредиле отворање привремени капацитети за сместување. Шпанскиот Национален суд во четвртокот дозволил нивно привремено користење по низа правни и политички спорови.
Премиерот Педро Санчез во меѓувреме се соочува со критики поради начинот на кој владата се справува со мигрантската криза.
