(Видео) Иран со нови напади врз американски цели на Блискиот Исток, првпат гаѓаше и во Сирија

Конфликтот меѓу САД и Иран продолжува да ескалира, откако Техеран соопшти дека извршил нови напади врз американски воени цели на Блискиот Исток, меѓу кои, како што тврди, за првпат била нападната и американска база во Сирија.

Ова следува по шестата последователна ноќ американски воздушни напади врз ирански воени објекти. Американската Централна команда соопшти дека нападите биле насочени кон дополнително слабеење на воените капацитети на Иран, при што биле погодени цели на островот Кешм, во близина на Бандар Абас, како и објекти поврзани со морнарицата и Иранската револуционерна гарда.

— реклама —

Според американската војска, во нападите биле употребени борбени авиони, беспилотни летала и воени бродови, а биле погодени десетици воени цели, меѓу кои позиции на противвоздушната одбрана, крајбрежни системи за надзор, логистичка инфраструктура и поморски капацитети.

Иранските власти соопштија дека како одговор биле лансирани ракети и беспилотни летала кон американски воени бази во неколку држави од регионот, вклучувајќи ги Јордан, Бахреин и Кувајт. Иранските државни медиуми објавија и дека Револуционерната гарда нападнала американски команден центар за специјални операции во Ал Танф, во Сирија, како одмазда за загинатите ирански војници во претходните американски напади.

— реклама —

Агенцијата „Ројтерс“ наведува дека не можела независно да ги потврди овие информации.

Во американските напади, според иранските медиуми, биле погодени повеќе мостови, железничка станица во Бандар Хамир и аеродромот Ираншахр. Државната агенција ИРНА објави дека седум лица загинале при напад врз мостови во Бандар Хамир, додека агенцијата Тасним извести за еден загинат цивил во близина на Чабахар.

Во меѓувреме, судирите продолжуваат и во други делови од регионот. Во Либан, борци на Хезболах се судриле со израелските сили, додека вооружени групи поддржани од Иран извеле напади со ракети и беспилотни летала врз американски цели во Ирак.

— реклама —

Новата ескалација речиси целосно го запре поморскиот сообраќај низ Ормускиот Теснец, една од најважните светски рути за транспорт на нафта и природен гас. Според „Ројтерс“, тоа повторно предизвика раст на цените на нафтата и нова загриженост за влијанието врз светската економија.

Иран, според извори на агенцијата, повторно ја активирал блокадата на Ормускиот Теснец, додека САД ги блокирале иранските пристаништа. Истите извори тврдат дека Техеран сигнализирал оти би можел да ги охрабри сојузничките Хути во Јемен да го затворат и теснецот Баб ел-Мандеб доколку продолжат американските напади врз иранската инфраструктура.

Портпаролката на Белата куќа, Каролин Левит, изјави дека американскиот претседател Доналд Трамп нема да дозволи, како што рече, да продолжат нападите врз пловните патишта без последици за Иран, но додаде дека Вашингтон и натаму е отворен за дипломатско решение.