Магарето Дорчо, кое вчеравечер слободно шеташе низ скопските улици и булевари во населбата Аеродром, е пронајдено и повторно е кај својата сопственичка.
Животното предизвика големо внимание кај граѓаните, кои го снимаа додека трчаше по коловозите и снимките ги објавуваа на социјалните мрежи, посочувајќи дека се движи без сопственик. Токму тие снимки ѝ помогнале на сопственичката побрзо да го лоцира и да го врати дома.
На видеото снимено во моментот на средбата, таа видно возбудена му се обраќа на Дорчо.
„Дојди, немам сила веќе да те бркам. Дојди, пиле, дојди Дорчо, дојди мило. Ајде, кажи здраво. Ајде. Браво. Ме измори. Еве го, убав мој“, се слуша на снимката.
Името Дорчо асоцира на коњот Дорчо од култната детска приказна „Волшебното самарче“, чиј сопственик беше дрварчето Трајче.
