(Видео) Израел уапси десет осомничени за насилствата врз фоторепортерка и европски дипломати

Десет лица се уапсени на Западниот Брег во рамките на операцијата „Маслинов лист“, поради сомневање дека биле поврзани со насилните инциденти од изминатиот викенд, меѓу кои и нападот врз фоторепортерката на „Вашингтон пост“, Хајди Левин.

Во заедничката акција на израелската безбедносна служба Шин Бет, граничната полиција и војската биле одземени и неколку возила, а биле отстранети и нелегални објекти, објави „Џерусалим пост“. Осомничените се предадени на распит, додека безбедносните сили ја продолжуваат истрагата за насилството извршено од екстремни израелски доселеници.

— реклама —

Комесарот на израелската полиција, Даниел Леви, порача дека законите важат за сите, без оглед на нивниот идентитет или припадност. Тој истакна дека полицијата постапува професионално и непристрасно, врз основа на докази и во согласност со прописите.

Американскиот амбасадор во Израел, Мајк Хакаби, претходно побара истрага и апсења, како и целосно законско гонење на учесниците во нападот врз фоторепортерката. Израелскиот премиер Бенјамин Нетанјаху, исто така, порача дека одговорните ќе сносат последици.

— реклама —

Левин била повредена во петокот за време на судирите меѓу екстремни доселеници и Палестинци на Западниот Брег. Според медицинските податоци, таа имала повреди на екстремитетите, а во изјава за порталот „Вала“ навела дека ѝ биле повредени и грбот и едно ребро. Таа опишала и продолжен напад во кој ѝ биле украдени фотоапаратите и личните предмети.

Во друг инцидент, маскирани доселеници нападнале европски дипломати кои биле присутни за време на напад врз палестински берачи на маслинки во близина на селото Тајбех. Белгискиот министер за надворешни работи, Максим Прево, го осуди нападот и порача дека белгиската влада ќе продолжи да бара санкции против одговорните за насилството и оние што ги поддржуваат.

— реклама —

Израелската полиција отвори истрага за нападот врз дипломатите откако на интернет се појавиле снимки од инцидентот.

Во меѓувреме, израелската војска, граничната полиција и полицијата ги засилиле активностите против прекршувањата на законот и растечкото националистичко насилство на Западниот Брег. Во последните недели, во просек, неделно се отстрануваат од седум до десет нелегални населби.

Централната команда на израелската војска планира во наредните недели дополнително да ги засили активностите за отстранување на нелегалните населби со цел да се спречат нови инциденти.