Припадник на израелската гранична полиција е суспендиран од должност откако беше објавена снимка на која се гледа како фрла шок-бомба во автомобил во бегалскиот камп Каландија на окупираниот Западен Брег.
Според израелскиот портал „Ynet“, на снимката од безбедносните камери се гледа како полицаецот се приближува до паркираното возило и по кратка вербална расправија фрла шок-бомба во автомобилот, која веднаш експлодира.
По експлозијата, двајца патници од задното седиште излегуваат и бегаат, додека полицаецот му го блокира излезот на возачот, спречувајќи го да го напушти возилото. Неколку моменти подоцна, тој се оддалечува, вперува оружје кон лицата кои побегнале и испукува истрели во нивна насока, додека тие со кренати раце бараат засолниште зад автомобилот.
Според информациите, во инцидентот нема повредени.
Израелската полиција соопшти дека е отворена истрага и дека полицаецот е отстранет од должност до завршување на постапката. Од полицијата наведуваат дека неговото постапување не било во согласност со службените процедури, поради што случајот е предаден на Одделот за внатрешни полициски истраги.
