(Видео) Израелски пратеник со чекан го кршел споменикот на убиени Палестинци на Западниот Брег

Израелскиот пратеник од крајната десница, Цви Сукот, и неколку негови соработници со чекани оштетиле споменик посветен на загинати Палестинци во селото Мадама на Западниот Брег. Инцидентот се случил за време на посетата на селото, која била одобрена и била спроведена под придружба на израелски војници.

На снимките што првично ги објавија палестински медиуми се гледа како Сукот и други мажи удираат по споменикот, додека војник стои непосредно до нив. Други припадници на израелските сили се гледаат во близина на воено возило.

Израелските одбранбени сили (ИДФ) соопштија дека посетата била одобрена, но дека Сукот и неговите придружници постапиле спротивно на договорениот план и без овластување започнале да го уриваат споменикот.

— реклама —

Споменикот, познат како „Споменик на мачениците“, и понатаму стои, но е значително оштетен. На него се испишани имињата на десет Палестинци од селото, со датуми на смрт од 1930 до 2004 година. На споменикот има и натпис што упатува на Народниот фронт за ослободување на Палестина (ПФЛП).

Сукот подоцна објавил сопствена снимка од оштетувањето и рекол дека реагирал затоа што ИДФ, според него, не ги отстранила спомениците на Западниот Брег што ги величаат палестинските борци. Тој побарал отстранување на, како што ги нарекол, „сите споменици на тероризмот“.

— реклама —

Меѓу имињата на споменикот се наоѓаат и Јаман Тајеб Али Фараџ и Шади Насар. Сукот го обвини Фараџ дека учествувал во самоубиствениот напад во 2003 година кај сообраќајната јазла Геха во централниот дел на Израел, во кој загинале четири лица, а повеќе од 20 биле повредени. Насар, пак, бил поврзан со напад во 2002 година во хотелот „Ешел ХаШомрон“ во Ариел, при што биле повредени 14 лица.

ИДФ соопшти дека Сукот на 12 август побарал дозвола за посета на споменици во селата Беита, Бурин и Мадама. Посетата била организирана со воена придружба, но била прекината откако пратеникот и неговите придружници започнале да го оштетуваат споменикот во Мадама.

— реклама —

Од израелската војска велат дека веднаш штом војниците забележале што се случува, ги известиле командантите, по што им било наредено да ја прекинат посетата и да ги изведат Сукот и неговите соработници од селото.

ИДФ истовремено нагласи дека редовно отстранува споменици и симболи за кои смета дека поттикнуваат насилство, но тоа го прави со соодветно одобрение. Војската го оцени вчерашниот потег како непотребен и наведе дека ангажирањето на војници за ваквата посета ги изложило на дополнителен ризик.

Инцидентот предизвика реакции и во израелскиот политички врв. Кабинетот на премиерот Бенјамин Нетанјаху го осуди постапувањето на пратеникот, нагласувајќи дека „земањето на законот во свои раце“, особено од страна на јавни функционери, е неприфатливо.

Од кабинетот на Нетанјаху порачаа дека ИДФ е надлежната власт на Западниот Брег и дека ваквите постапки ја попречуваат способноста на војската да се концентрира на борбата против тероризмот и поттикнувањето насилство.