(Видео) Камала Харис повторно во политичка офанзива: Подготвува ли нова кандидатура за Белата куќа?

Поранешната потпретседателка на САД, Камала Харис, повторно е во центарот на американската политичка сцена, две години по поразот од Доналд Трамп на претседателските избори. Со остри критики кон актуелниот претседател и пораки за иднината на Демократската партија, таа не ја исклучува можноста повторно да се бори за Белата куќа во 2028 година.

Харис во рамките на кампањата за претстојните меѓуизбори посети кандидати на Демократската партија во седум сојузни држави, а турнејата ја заврши со дводневна посета на Џорџија.

— реклама —

На предизборните собири таа го нарекуваше Трамп „бесчувствителен, корумпиран и неспособен“, а поради обновувањето на Белата куќа и златните украси иронично го нарече „главен украсувач“.

— реклама —

Сепак, нејзините пораки не беа насочени само кон критики на сметка на претседателот. Харис ги повика демократите незадоволството да го претворат во политичко дејствување, нагласувајќи дека е време за промени во партијата и поодлучно користење на политичката моќ за исполнување на ветувањата.

— реклама —

Таа се заложи и за структурни промени во американската демократија, меѓу кои проширување на Врховниот суд, доделување статус на сојузни држави на Вашингтон и Порторико, како и преиспитување на изборниот колегиум.

За време на посетата на Џорџија, Харис се осврна и на историјата на борбата за граѓански права, обвинувајќи го Врховниот суд на САД за расизам поради одлуката со која, според неа, е ослабен Законот за избирачки права.

Поранешната потпретседателка предупреди и на можноста Трамп да се обиде да влијае врз претстојните избори, повикувајќи ги граѓаните да излезат во што поголем број. Засега нејзините политички активности повторно го отвораат прашањето дали Харис ќе влезе во трката за претседателската функција во 2028 година.