Повеќе од 715.000 луѓе денеска беа евакуирани во кинеската провинција Гуангдунг поради ударот на тајфунот Ноул, кој го погоди јужниот брег на Кина, носејќи силни ветрови и обилни врнежи, поради што беше прогласен највисок степен на предупредување за поројни поплави.
Ноул, најсилниот тајфун што досега ја погодил Кина оваа година, стигнал до копното во округот Хуејдунг во провинцијата Гуангдунг околу 3:50 часот по локално време, соопштија кинеските власти.
Се очекува невремето во наредните два дена да донесе обилни до екстремно обилни врнежи во голем дел од јужна Кина, откако подрачјата на Гуангдунг и Хонг Конг веќе беа погодени од ветрови со јачина на бура.
Кинеските власти прогласија највисок степен на предупредување за поројни поплави во неколку провинции, а метеоролошките служби предупредија на особено обилни врнежи во одделни области, вклучувајќи ја и провинцијата Фуџијен.
Како што тајфунот ќе се движи кон внатрешноста на земјата, се очекува силниот ветер и обилните дождови да ги зафатат и соседните провинции Џијангси и Хунан, пишува „Гардијан“.
Во Хонг Конг, аеродромските власти соопштија дека во неделата биле откажани околу 350 летови.
Ноул е дванаесеттиот тропски циклон оваа година и третиот што ја погодил Кина во текот на овој месец.
На почетокот на месецов, тајфунот Бави донесе силни ветрови и дожд во источна Кина, поради што беа евакуирани повеќе од два милиони луѓе.
