Тајфунот Саудел утрово ја погоди источната обала на Кина на две локации, поради што властите наредија масовни евакуации и привремено го прекинаа железничкиот и траектниот сообраќај.
Според државните медиуми, тајфунот прво го погодил градот Тајџоу околу 8 часот по локално време, а околу еден час подоцна и Венџоу. Ова е трет тајфун што годинава ја погодува кинеската провинција Жеџијанг.
Се очекува Саудел да донесе обилни врнежи во Жеџијанг и во соседната крајбрежна провинција Фуџијан, а додека се движи кон внатрешноста, силни дождови се можни и во Хубеи, Гуангси и Јунан.
Според кинеските медиуми, при излегувањето на копно брзината на ветерот достигнувала околу 35 метри во секунда.
Во Венџоу властите наредиле евакуација на повеќе од 820.000 луѓе, додека во Тајџоу се очекува евакуација на уште околу 52.000 жители.
Патничките траектни линии во Тајџоу се привремено прекинати, а железничкиот оператор China Railway Shanghai Group запрел дел од линиите во Жеџијанг во четврток и петок.
Фуџијан уште во четврток прогласи вонредна состојба поради тајфунот, ги запре работите на проекти долж крајбрежјето и затвори 57 патнички траектни линии.
