(Видео) „Кога тогаш, ќе одговараат! Ве гледам во очи и ви кажувам“, рече Мицкоски за Ива Михаилова и татко ѝ, па ја повика Бугарија да ги врати

Премиерот Христијан Мицкоски тврди дека Ива Михаилова нелегално била пренесена во Бугарија и категорично ги отфрли информациите дека таа и нејзиниот адвокат ја преминале границата преку официјален граничен премин. Тој најави дека Министерството за внатрешни работи истражува како Михаилова ја напуштила Македонија и порача дека и таа и нејзиниот татко ќе се соочат со македонските институции.

„Апсолутно е невистина тоа што го емитуваа бугарските медиуми, односно го пласираа во јавноста, дека заедно со нејзиниот адвокат поминале на регуларен граничен премин и дека таму биле поздравени, дека им се салутирало и така натаму. Тоа претставува лага“, изјави Мицкоски.

Според премиерот, последниот евидентиран влез на адвокатот во Македонија бил на 28 септември, што, како што рече, било потврдено и од бугарската страна.

— реклама —

„Можам да потврдам дека на нелегален начин е пренесена во Бугарија. Министерството за внатрешни работи истражува и ќе дојдеме до сознание на кој начин е однесена“, рече Мицкоски.

Тој упати критики и до политичкото раководство на Бугарија, обвинувајќи го дека го користи случајот за демонстрирање политичка моќ и нарушување на меѓусоседските односи.

„Жалам што политичкото водство во Бугарија се обидува на овој начин да покаже политички мускули, а не ја сфаќа штетата што самото си ја прави на меѓународен план. Тоа е нивна одлука. Тие избрале ваква политика“, изјави премиерот.

— реклама —

Мицкоски изрази жалење и поради, како што рече, начинот на кој Михаилова се претставува во Бугарија, нагласувајќи дека најголем дел од животот и образованието ги поминала во Македонија.

Одговарајќи на новинарско прашање за можноста Бугарија да ја екстрадира Михаилова, со оглед на уставната заштита на бугарските државјани, премиерот не даде конкретна процена дали екстрадицијата е правно изводлива. Наместо тоа, повтори дека македонските власти бараат нејзино враќање.

Тој ги коментираше и обвинувањата од опозицијата дека заминувањето на Михаилова во Бугарија било однапред договорено, тврдејќи дека опозицијата и бугарското политичко раководство имаат идентични позиции.

— реклама —

„Намерата е да се создаде политичка тема за која претпоставиле дека ќе влијае на рејтингот на владејачката коалиција, односно на ВМРО-ДПМНЕ, и на тој начин ќе обезбедат одредена корист за опозицијата“, рече Мицкоски.

Премиерот ги отфрли тврдењата за наводен договор и ја повика бугарската страна веднаш да ги врати Михаилова и нејзиниот татко.

„Ако е тоа така договорено, ние ги бараме назад и неа и нејзиниот родител. Уште денеска нека ги донесат и да видиме дали е така договорено или не“, изјави тој.

Мицкоски повеќепати повтори дека двајцата ќе мора да се соочат со македонските власти.

„Ве гледам во очи и ви кажувам: кога-тогаш. И татко ѝ и таа ќе одговараат. Кога-тогаш“, порача премиерот.

Ива Михаилова е обвинета за сообраќајна несреќа со смртни последици, а нејзината вина треба да се утврди во судска постапка. Во доставената изјава премиерот не прецизира за која правосилна пресуда и за кое лице зборува кога бара враќање во Македонија за издржување казна.