Мобилен тим на Царинската управа спречил обид за криумчарење на 2.000 вијали со медицинскиот раствор „Гадонанс“, кои биле сокриени во кабината на товарно моторно возило на граничниот премин Деве Баир.
Како што соопшти Царинската управа, возачот, косовски државјанин вработен во транспортна компанија од Косово, превезувал алуминиумски профили на релација Турција – Косово. При царинската контрола изјавил дека нема ништо за пријавување освен декларираната стока, по што, поради сомневање, била извршена детална проверка на возилото.
При контролата биле пронајдени вкупно 2.000 вијали, спакувани во папки и кеси, без оригинално пакување. Медицинските препарати биле сокриени на повеќе места во кабината на камионот – во горниот кревет, во фабричка преграда, над возачкото седиште и во личниот багаж сместен во долниот кревет.
Вијалите се запленети, а Одделението за истраги при Царинската управа поднело кривична пријава против возачот поради сомнение за сторено кривично дело криумчарење.
Од Царинската управа посочуваат дека медицинските препарати, меѓу кои и растворот „Гадонанс 7,5 милилитри“, кој се користи при магнетна резонанца, подлежат на задолжителни дозволи за увоз, како и на строго пропишани услови за чување и транспорт.
Воедно, оттаму информираат дека од почетокот на годинава спречиле 13 обиди за криумчарење и заплениле вкупно 29.000 парчиња лекови и медицински препарати.
