Пратеничката на ВМРО-ДПМНЕ, Биљана Кузманоска, на денешната прес-конференција информираше дека е во тек јавниот повик на Владата за „Поддршка за креирање на нови работни места“, наменет за македонските компании кои планираат да го прошират своето работење и да вработат нови работници.
Според Кузманоска, преку подмерката „Вработување и раст на правни субјекти“ ќе бидат поддржани компании за отворање вкупно 1.385 нови работни места, при што грантот ќе изнесува од 160.000 до 250.000 денари за секое ново вработено лице.
Таа посочи дека за мерката се обезбедени 332.650.000 денари, односно околу 5,4 милиони евра, а секоја компанија ќе може да добие поддршка за вработување најмногу пет лица.
Кузманоска објасни дека највисокиот грант, во износ од 250.000 денари, е предвиден за вработување млади лица до 29 години.
За корисници на гарантирана минимална помош, Роми, лица со попреченост, жени, долгорочно невработени лица и жени Ромки со завршено средно или високо образование, финансиската поддршка ќе изнесува 220.000 денари по лице.
За невработени лица постари од 29 години грантот ќе биде 160.000 денари по новоотворено работно место.
Како новина во мерката, Кузманоска го посочи опфаќањето на повратниците, при што за секое вработено лице повратник работодавачот ќе добие дополнителни 10 проценти од одобрениот износ на грантот, во зависност од категоријата на невработениот.
Според Кузманоска, со овие мерки Владата има цел да создаде нови можности за вработување, професионален развој на граѓаните и подобри услови за раст и развој на домашното стопанство.
