(Видео) Мароко именува автопат по Доналд Трамп

Мароканскиот крал Мохамед VI официјално потврди дека една од најважните сообраќајници во земјата го носи името на американскиот претседател Доналд Трамп.

Како што објави државната новинска агенција на Мароко, кралот во писмо до Трамп навел дека преименувањето на автопатот претставува „личен израз на голема почит“.

— реклама —

Автопатот Тизнит–Дахла, долг 1.055 километри, минува низ Западна Сахара – територија околу која со децении постои спор. Мароко го смета регионот за дел од својата територија, додека дел од него е под контрола на Фронтот Полисарио, движење кое се залага за независност на Сахарците.

— реклама —

Во писмото, кралот потсетува дека САД за време на првиот мандат на Трамп во 2020 година го признаа мароканскиот суверенитет над Западна Сахара.

— реклама —

„Историското признавање на мароканскиот суверенитет над Сахара засекогаш ќе остане во сеќавањето на Мароканците, од генерација на генерација“, напишал Мохамед VI.

— реклама —

Трамп минатата недела на својата социјална мрежа Truth Social му се заблагодари на мароканскиот крал за оваа чест и објави видео од автопатот, наведувајќи дека неговата изградба чинела речиси една милијарда долари.

„Со нетрпение го очекувам денот кога ќе поминам по целата должина на овој голем автопат, се надевам, многу скоро“, напиша Трамп.