(Видео) Марсеј во пламен и судири: Демонстранти упаднаа во градското собрание, ограбени продавници и нападната полицијата

Насилни судири, запалени барикади, ограбени продавници и упад во градското собрание го одбележаа денешниот протест во Марсеј, додека демонстрации против високите трошоци за живот се одржуваат во повеќе француски градови.

Според АФП и француските медиуми, група демонстранти насилно ја пробиле влезната врата на градското собрание во Марсеј, влегле во објектот и оштетиле дел од инвентарот. Во внатрешноста била соборена и биста на Маријана, симболот на Француската Република.

— реклама —

View this post on Instagram

— реклама —

На улицата Канебиер биле искршени излози и ограбени повеќе продавници, додека демонстранти се судриле со полициските сили. Полицијата употребила солзавец, а во градот биле распоредени и оклопни возила.

Нападнати биле и простории на општинската полиција, каде што биле искршени стакла и фрлени димни средства. Според полициските власти, бил спречен обид за подметнување пожар.

— реклама —

Протестите се дел од поширока мобилизација во Франција поради поскапувањата и трошоците за живот, на која се приклучиле студенти, синдикалци и поддржувачи на движењето „Жолти елеци“.

Францускиот претседател Емануел Макрон, кој претходно од Брисел повика на смиреност, порача дека правото на протест мора да биде придружено со почитување на луѓето и имотот.

На социјалните мрежи се појавија и тврдења за пожар во близина на катедралата во Марсеј, но за тој конкретен инцидент засега нема независна потврда.