(Видео) Масакр во Луизијана: Маж уби осум деца – ги застрела сопругата и уште една жена

Маж од американската сојузна држава Луизијана застрелал седум од своите деца и уште едно дете во напад врз сопственото семејство, додека бил во процес на разделба со сопругата, која исто така била застрелана и тешко повредена, изјавил роднина.

Насилството што се одвивало рано наутро во неделата во две куќи во Шривпорт претставува едно од најсмртоносните масовни пукања во САД во последните години, пишува АП.

Напаѓачот, идентификуван како Шамар Елкинс, починал по бегство и полициска потера која завршила со тоа што полицајците отвориле оган кон него.

— реклама —

Според официјалните информации, убиените деца – три момчиња и пет девојчиња – биле на возраст од 3 до 11 години. Едно лице скокнало од покривот на куќата и се очекува да преживее.

„Не знам што да кажам, срцето ми е скршено“, изјавил началникот на полицијата во Шривпорт, Вејн Смит. „Не можам ни да замислам како може да се случи вакво нешто.“

— реклама —

Елкинс и неговата сопруга, идентификувана од семејството како Шаника Елкинс, биле во процес на разделба и требало да се појават на суд во понеделник, изјавила Кристал Браун, роднина на една од повредените жени. Таа додала дека двојката се расправала околу разделбата непосредно пред пукањето.

Полицијата соопшти дека пукањето започнало пред зори, кога напаѓачот застрелал жена во куќа јужно од центарот на градот. Потоа се упатил кон друга куќа на неколку улици подалеку, каде почнал да пука врз децата. Меѓу убиените бил и негов внук.

Сосетка, која живее две куќи подалеку, изјавила дека нејзината безбедносна камера го снимила осомничениот како бега, заедно со звукот од истрели.

— реклама —

Подоцна, кога излегла надвор, видела тело на дете на покривот од куќата.

Според локални власти, некои од децата се обиделе да избегаат преку задниот дел од куќата.

Полицијата соопшти дека нема информации за претходни пријави за семејно насилство поврзани со напаѓачот.

Елкинс служел во Националната гарда на Луизијана од 2013 до 2020 година, без распоредувања, и немал обемно криминално досие. Во 2019 година бил осуден условно поради незаконска употреба на оружје.