(Видео) Масовен напад врз Москва: Соборени 249 дронови, погодена нафтена рафинерија

Најмалку две лица загинаа, а шест се повредени во ноќниот напад со дронови врз поширокото подрачје на Москва, кој руските власти го опишаа како „масовен“.

Гувернерот на Московската област, Андреј Воробјов, соопшти дека биле соборени 249 дронови, а избувнале пожари во неколку станбени објекти и во магацин. Во самата Москва била оштетена нафтена рафинерија, додека два аеродроми вовеле ограничувања во воздушниот сообраќај, објави Би-би-си.

Воробјов во неделата на Телеграм прецизираше дека во Софјино загинала 44-годишна жена откако дрон удрил во трикатница. Во нападот биле повредени уште пет лица, меѓу кои и две деца.

— реклама —

Тој потврди и дека во областа Орехово-Зуево загинал постар маж откако бил погоден неговиот приватен дом.

Градоначалникот на Москва, Сергеј Собјанин, соопшти дека еден дрон погодил зграда во близина на градскиот булевар и потврди дека е оштетен објект во нафтената рафинерија.

— реклама —

Претходно Собјанин објави дека 152 дрона биле соборени додека се движеле кон Москва.

Најголемиот московски аеродром Шереметјево ги предупреди патниците на „привремени ограничувања“, додека на аеродромот Внуково привремено биле прекинати сите полетувања и слетувања.

— реклама —

Во меѓувреме, на социјалните мрежи се појавија снимки на кои наводно се гледаат експлозии на ноќното небо и магацин во пламен. Би-би-си не можел независно да ја потврди автентичноста на снимките.

Истовремено, украинските власти известија за жртви во руски напади во текот на саботата.

Началникот на Киевската област, Тимур Ткаченко, потврди дека во нападот врз градот Фастив загинале мајка и нејзините две мали деца. Оштетени биле и неколку приватни куќи.

Во североисточниот регион Суми, четири лица загинале откако руски дрон погодил автомобил во кој се превезувале, соопшти локалниот функционер Олег Хрихоров.

Русија и Украина во последните недели ги засилија меѓусебните напади, при што чести цели се енергетската и транспортната инфраструктура, како и големи логистички центри.